قصيدة غزليه لي وابي من الاعضاء ان يختارون لها اسم (عنوان)

تعالي يالهبوب اللي تلوفيـن الضمايـر لـوف
أنا جيت لسنـام الشعـر متهيّـض وشرّفتـه

تعالي واكشفي خافي السراير والعبـاد وقـوف
ولـش منـي قصيـدٍ ماتهجّيـتـه وحرّفـتـه

ابيش العذر لامني حكيت بمـا حـواه الجـوف
عشان آقول باحت بالسدود وخاطـري عفتـه

أنا ربّي رماني في محبـة ضامـر السرجـوف
عشقته والهـوى دربٍ جديـد ومابعـد طفتـه

يقولون الهوى خوّف شجاعٍ مايعرف الخـوف
غرايب ياهوى حتى حريـب الخـوف خوفتـه

أنا بمشيك والدنيا تجـارب والحيـاه صـدوف
فداوي وانتحاري وأن نطحـت الجمـع وقّفتـه

على شان الرموش اللي حاولين العيون صفوف
إلى من شافها راعي السوالف سـج سالفتـه

على شانك يا بو ليلٍ على باقي الجسم مرصوف
أبيع العمر لك مـن دون مـا افكـر بتكلفتـه

جمالك ماتغيّر لو تحلّى فـي عتيـق الصـوف
مكانك فالصـداره والصحيـح تبيـن معرفتـه

هويتك وامتلكت اكبر غلا يا أغلا ثلاث حروف
وعطيتك حب من صادق شعوري .. ماتسلفتـه

تعال وشف غلاك وسم بالرحمن قبـل تشـوف
لأنـه ماتصدقـه العيـون السـود لاشفـتـه

عظيم ومايعبر عن مقامـه فلسفـه ووصـوف
يضيع الحكي كله لو شرحتـه لـك ووصفتـه

مكانه فالصدر ماشافه الواشـي ولا الملقـوف
وعدت القلب فـي حفظـه وحلّفنـي وحلّفتـه

عليه القلب درع وفوقه الأضلاع حدب سيـوف
وانا فارس غـلاك اللـي مواقيفـه مشرّفتـه


وسلامتكم

لو تكرمتوا

وابي من كل عضو يعطيها عنوان